DAVAO CITY – Mihangyo ngadto sa Department of Trade and Industry XI ang pipila ka mga manufactures sa mga produkto nga sagad ginapalit matag pasko nga mupausbaw kini sa ilang presyo.
Matud kang Rachel Remitio, City Director sa DTI Davao City Field office, lakip sa mga kompanya nga mihangyo sa pagsaka sa presyo mao ang adunay produktong mayonnaise, cream, pasta, spaghetti sauce, ug ham.
Hinuon, wala pa sa karon gisugdan ang pag-review sa hangyo sa maong mga kompanya.
Apan, una nang nagpasidaan ang DTI nga kung adunay extra nga kwarta, mas maayong magsugod na sa pagpalit og mga noche buena products.
Gipanaad sab sa buhatan nga dili mu-sobra sa 10% ang pagsaka sa presyo sa mga palaliton.
Gawas pa niini, gi-angkon sab sa maong buhatan nga misaka ang presyo sa mga nag-unang palaliton karong bulan sa Agosto diin una nang giaprubahan kaniadtong Agosto 12, ang pagsaka sa Suggested Retail Price (SRP) diin miabot og 6% ang pagsaka sa presyo sa mga nag-unang palaliton sama sa gatas, kape, noodles ug mga de lata.
Kahinumduman usab kaniadtong Mayo 11 ning kasamtangan tuig, gipatuman sab ang pagsaka sa SRP.
Samtang, gitataw sa opisyal, nga mi-agi una kini og hugot nga proseso ang pagsaka sa presyo sa mga palaliton ug gi-aprubahan kini sa central office gumikan walay gipatuman nga paglihok sa presyo sa miaging duha ka tuig hatod sa COVID-19 pandemic.
Sa kasamtangan, gipadayon sa buhatan ang hugot nga monitoring sa 31 ka mga dagkong establisyemento dinhi sa syudad kung nakasunod ba kini sa gitakda nga SRP.
Via || Bombo Hana Rallos
