DAVAO CITY – Giilang usa ka mahinungdanon nga butang ang pipila ka mga accomplishments ni Pangulong Rodrigo Duterte nga iyang gibutyag atol sa iyang ika-upat nga State of the Nation Address (SONA) kagahapong adlawa.
Sumala pa kang Ramon Casiple, usa sa mga advocate sa Federalism, nga pipila sa mga dakong nahimo sa Pangulo ang pagpatuman sa BARMM ug pagpalabang sa BOL nga maoy dalan aron nga matapos ang rebelyon sa pipila ka bahin sa Mindanao nga nasugdan kaniadtong 1970s.
Gani nahimo sumala pa ang maong lakang ni Pangulong Duterte nga wala nahimo sa milabay nga mga Pangulo sa nasod.
Samtang bisan nga wala nahisgutan ang kalabot sa Pederalismo o ang planong pagbag-o sa sistema sa gobyerno, nagtuo si Casiple nga wala pa gihapon hingpit nga gipadaplin ang maong plano. Anaa lamang sumala pa sa kongreso kung andam kini sa ipatuman ang kabag-ohan sa sistema sa kagamhanan.
Samtang sa isyu sa West Philippine Sea (WPS) gikanayon ni Casiple nga gipasabot lamang sa Pangulo kung paunsa huptan ang sitwasyon sa giilogan nga isla sa malinawon nga pamaagi pinaagi sa usa ka negosasyon luyo sa paulbo sa tensiyon.
