DAVAO CITY – Giklaro sa Department of Health (DOH) XI nga dili angay nga ikaalarma ang pinakaunang kaso sa meningococcemia sa rehiyon sa Dabaw kini human nga gikumpirma sa DOH nga meningococcemia ang gikamatyan sa upat ka tuig nga batang lalaki niadtong Biyernes.
Gibutyag sab sa mga health officials nga kini ang pinakaunang kaso sa nasangpit nga sakit sa rehiyon sa Davao.
Hinoon, gisiguro sa mga opsiyal nga dili kini angay nga kahadlukan gumikan kay nahatagan na og post-exposure prophylaxis (PEP) ang adunay direct contact sa biktima.
Kahinumduman nga gilayong gihatagan og PEP ang mga miyembro sa pamilya sa biktima, mga classmate niini, maestra ug labi na ang mga staff sa emergency room kun diin gi confine ang bata.
Giasoy ni Dr. Jack Estuart, attending physician sa biktima nga gidala ang bata sa balay tambalanan banda alas 10 sa buntag ug nakitaan na kinig manifesto sa sintomas sa sakit.
Dugang pa niya nga gi-admit ang bata nga dunay taas nga hilanat ug gasuka-suka na kini ug sa wala madugay, nakabsan kini sa kinabuhi alas 3 sa hapon sa samang adlaw.
Gilihok gilayon sa mga doktor ang protocol nga protektahan ang mga tawo nga nakapalibot sa biktima.
Gipasabot sab ni Dr. Annabelle Yumang, regional director sa Department of Health- Davao Region (DOH-11) nga ang bakterya nga hinungdan sa sakit nga meningococcal dili dali makuha.
-Larawan gikan sa Department of Health Davao Region.
