DAVAO CITY – Gikatakdang bisitahon sa Philippine Drug Enforcement Agency (PDEA) 11 ang uban pang mga tulonghaan sa dakbayan aron nga manghatag ug PDEA-Comics ngadto sa mga estudyante.
Kahinumduman nga unang gibisita sa mga personahe sa ahensiya kagahapong adlawa ang Buhangin National High Schools diin gipangunahan kini ni PDEA regional director Antonio Rivera.
Mabasa sa nahisgutan nga komiks ang mamahimong epekto sa illegal nga droga sa higayon nga mogamit niini.
Mahinungdanon sumala pa nga samtang anaa pa sa bata nga pangidaron makat-onan na sa mga nahisgutan kung paunsa makalikay sa maong bisyo.
Mikabat sa 1,400 ka mga komiks nga tagalog ug english ang gipang-apud apod sa PDEA sa nahisgutan nga tulonghaan.
Nasayran sab nga ilakip na sab karon sa mga subject sa tulonghaan ang pagtudlo kalabot sa paglikay ug epekto sa paggamit ug illegal nga droga.
