DAVAO CITY- Gipasalig ni Pangulong Ferdinand “Bongbong” Marcos Jr. nga sa higayon nga makumpleto na ang katukuran sa Samal Island – Davao City Connector Bridge Project, mapalambo niini ang ekonomiya sa Isla sa Samal ingon man sa dakbayan sa Davao.
Gawas niini, gikanayon sab sa pangulo nga maghatag kini og dalan alang sa kalambuan sa sitwasyon sa panginabuhian, trabaho, edukasyon ug uban pang serbisyo alang sa tanang residente.
Sa gipahigayon nga groundbreaking ceremony kaganihang buntag, gipasalamatan sa pangulo ang China gumikan sa pagpaningkamot ug pakig-alayon niini sa Pilipinas alang sa nahisgutang infrastructure development program.
Nagpakita lamang matud pa kini og lig-on ug malungtarong pundasyon sa bilateral relations ug kooperasyon tali sa duha ka mga nasud.
Pinaagi sa tabang sa maong nasud ingon man sa pagpaningkamot sa Department of Public Works and Highways, mamahimo matud pa nga maka-accomodate ang maong tulay og anaa sa 25,000 ka mga sakyanan matag adlaw ug makunhuran ang travel time tali Samal ug Davao gikan 50 minutos ngadto na lamang sa singko minutos.
Gawas niini, mas dali na lamang usab ma-access sa mga turista ang mga nindot nga tourism spots nga nahimutang sa Samal Island.
Ginalantaw usab nga gumikan niining maong proyekto, mamahimong paspas ang pagbawi ug pagrekober gikan sa kapakyasan hatud sa pandemya.
Sa pikas bahin, dako ang kalipay ni Pangulong Marcos sa pagpanguna sa groundbreaking sa maong tulay nga unang gipaningkamutan ilalom sa administrasyon sa kanhi Pangulong Rodrigo Duterte.
VIA|| Allianne Ferandos Silao
