DAVAO REGION- Nakaplagan ang usa ka patay’ng lawas sa Purok 8, Sitio Gagpang, Barangay Alegre, Bansalan, Davao del Sur kagahapong adlawa bandang alas 6:20 sa gabii.
Base sa imbestigasyon sa kapulisan, nailhan ang maong biktima nga si Albert Lumen nga residente sa Emely Homes Subdivision, Digos City ang nakit-an nga gilubong duol sa panimalay ni alyas ‘Ruben’, diin nahitabo ang insidente.
Sumala pa sa mga niresponde nga otoridad, uban sa usa ka Barangay Kagawad ug pipila ka mga residente sa maong lugar, nakadiskubre ang patay’ng lawas sa maong dapit.
Sa pormal na imbestigasyon sa kapulisan, usa ka testigo ang misaysay nga bandang alas 4:00 sa hapon kaniadtong Setyembre 25, 2024, nadunggan niya ang daghang pagpamusil duol sa maong nahitabuan, nga giingong tig-alima sa maong luna.
Daling nagpahigayon og pagpangita ang mga kapulisan og nakita ang 3 ka basiyo sa bala sa punto 45 nga baril sa maong dapit.
Sa pagkakaron, anaa na sa kustodiya sa kapulisan ang mga ebidensya alang sa tukmang disposisyon.
Ning kasamtangan ginasuta pa sa mga otoridad ang mibuhat sa mangilngig nga krimen.
Samtang, ang patay’ng lawas sa biktima anaa na karon sa Brilliantes Funeral Home.
