Gibalibaran ni Pangulong Ferdinand Marcos Jr. ang courtesy resignation ni DILG Secretary Jonvic Remulla, DOJ Secretary Jesus Crispin Remulla, ug Defense Secretary Gilberto Teodoro.
Kini ang gikumpirma ni Executive Secretary Lucas Bersamin sa iyang pakighimamat sa mga miyembro sa Malacañang Press Corps. Bisan pa niana, wala siyay update kabahin sa courtesy resignation ni National Security Adviser Eduardo Año. Matod ni Bersamin, personal kaayo ang posisyon sa NSC (National Security Council) sa Pangulo ug wala kini giagi sa Office of the Executive Secretary ang resignation ni Sec. Año.
Gikumpirma usab ni Bersamin nga gidawat na ni Pangulong Marcos ang courtesy resignation ni CHED Chairperson Popoy De Vera. Sumala pa ni Bersamin, buot sa Pangulo og bag-ong pagsugod sa CHED, maong iyang gidawat ang pagkanaog ni De Vera.
Wala lamang gipasabot ni Bersamin kung unsay tinud-anay nga rason sa desisyon sa Presidente.
