DAVAO CITY – Ipadayon sa pamilyang Duterte ang tinuig nga pagpanghatag ug pahalipay karong Pasko human sa duha ka tuig nga pagkahunong niini tungod sa pandemya.
Mubalik na sa face-to-face set up ang naandang tradisyon sa pinakailadong pamilya sa Davao City diin muadto ang katawhan sa ancestral house sa mga Duterte aron makadawat ug mga pinaskuhan.
Gikanayon ni Davao City Police Office spokesperson Police Major Catherine dela Rey nga ipatuman ang hugot nga seguridad sa mga kadalanan sa Taal Road, Central Park Subdivision sa Barangay Bangkal.
Kapin 4,000 ka mga personahe gikan sa kapulisan, kasundaluhan, ug CTTMO ang ipakatag sa adlaw sa gift-giving event.
Gilauman na sa tigpamaba ang pagdagsang sa mga tawo gumikan sa pagluag sa mga restriksyon, lakip na sa mga panagtapok.
Libuan ka mga residente ang gilauman nga muadto sa mga Duterte karong adlaw sa Pasko alang sa pagdawat sa ilang pinaskuhan nga grocery packs.
Kahinumdumang sa milabayng tuig, libuan ka mga Dabawenyo ang nakadawat sa maong pinaskuhan apan dunay pipila nga gipiling ihatag kini ngadto sa mga kabus pinaagi sa SafeDavao QR code.
via || Bombo LJ Florendo
