DAVAO CITY – Luyo sa planong pagtanom ug liboan ka mga punoan sa sakura dinhi sa dakbayan partikular na daplin sa mga kadalanan, nagpadayag sab sa ilang kabalaka ang mga environmental group kalabot sa mamahimong epekto sa pagtanom sa non-endemic species ngadto sa atong ecosystem.
Kahinumduman nga sa milabaya nga semana, gibutyag ni Japanese Chamber of Commerce Philippines president Ichido Miyake nga usa ka Japanese firm pinaagi sa Japanese agriculturist Masayuki Takahashi ang plano nga magtanom ug sakura o cherry blossoms sa Barangay Mintal ning dakbayan.
Sumala pa kang Interface Development Interventions (Idis) environment research specialist Lemuel Manalo, ang nahisgutan sumala pa nga tanom ang dili ha-om sa tropical region ug kinahanglan sumala pa ug dugang pundo ug insecticides aron nga padayon kini nga mabuhi.
Mamahimo sumala nga motanom una ug duruha ngadto na sa tulo ka seedling apan kung ipatuman ang pagtanom ug 10,000 ka mga punoan niini, mamahimong lisud kini ug kinahanglan ug dako nga pundo.
Gisugyot hinuon sa nahisgutan nga grupo nga pagtanom ug Palawan Cherries nga ha-om sa tropical temperature ug sa local ecosystem.
Wala sab sumala pay kasiguruhan nga mabuhi ang nahisgutan nga punoan sa kahoy human nga una na matud pa kini nga gisulayan sa uban nga nasod apan napakyas ug wala milahutay.
