DAVAO CITY- Mokabat sa 1,208,100 ang kinatibuk-an nga penalty ang gikan sa mga masinupakon sa balaod trapiko sukad nga gipahigayon nga operasyon sulod lamang sa pipila ka mga adlaw human nga gipatuman sa kapulisan ang mga balaod gikan sa nasyunal ug dinhi sa lokalidad sukad July 21, 2024 hangtod sa July 27, 2024.
Kini ang kabahin gihapon sa padayon nga tinguha sa Davao City Police Office sa pagsiguro sa kaluwasan ug seguridad sa dakbayan ilawom sa kadumalaan ni Acting City Director PCOL HANSEL M MARANTAN, sa pagpanguna sa Traffic Enforcement Unit uban ang 19 ka mga police stations.
Kini ang gilusad sa kapulisan nga operasyon arn nga masiguro ang kaluwasan sa mga motorista ug pedestrians.
Gumikan niini, nagmalampuson ang pagdakop sa mga ‘BORA-BORA’ nga tambotso sa mga motorsiklo nga usa kini sa gidili dinhi sa dakbayan gumikan kabahin kini sa nuisance motorcycles.
Ang nasampit nga operasyon miresulta sa unom ka mga Citation Tickets nga miresulta sa penalty nga nagkantidad ug Php 3,000.
Samtang, gipahigayon sab ang 406 ka mga operasyon kabahin sa RA 4136, nga mihatod sa pag-isyu sa 193 Temporary Operator’s Permits ug pagkolekta sa penalty nga mokabat sa Php 433,500.
Samtang gilusad sab ang operasyon pinaagi sa pagpatuman sa City Ordinance 0334-12 nga miresulta sa 606 ka mga operasyon ug pag-isytu sa 1,051 ka mga Citation Tickets, nga mihatod sa pagka-kolekta sa Php 570,600 nga penalty.
Ilawom usab sa City Ordinance 0270-23, series of 2023 kon Speed Limit Ordinance, adunay 172 ka mga gipangdakop ug pag-isyu sa Citation tickets ang gipahigayon nga nagkantidad ug Php 172,000.sa kinatibuk-an.
Dugang pa nga ang “No Helmet, No Travel” policy operation miresulta usab kini sa pagkasikop sa 54 ka mga drayber ug naisyuhan kini sa Citation Ticket nga adunay multa nga 27,000, satang sa “No Plate, No Travel” operation miresulta usab kini sa upat ka mga gipangdakop nga miresulta sa multa nga 2,000 human sa giisyu nga Citation Ticket.
Tungod niini naghangyo karon ang DCPO sa tanang motorista nga tamdan ang balaod trapiko ma-lokal man o sa nasyunal aron nga malikayan ang kalangay ingon man ang multa.
Ang pag-isyu sa TOPs ug Citation Tickets sa tanang masinupakon sa balaod ang pamatuod lamang nga aduna pa’y mga indibidwal nga dili motuman sa mga pamalaod ug regulasyon samtang anaa kini sa mga kadalanan.
Nagpahinumdom usab kini sa katawhan nga ang luwas nga kadalanan mao ang nag-unang gikinahanglan sa mga pamilya ug sa tanang residente sa dakbayan.
