Gipasalig sa Department of Energy o DOE nga igo pa ang suplay sa lana sa nasud sulod sa 50 ka adlaw, samtang gilauman ang pag-abot sa dugang nga buffer stocks karong bulan sa Abril.
Sumala kang DOE Undersecretary Sandy Sales, mokabat sa 900,000 barrels sa lana ang nakatakdang moabot karong buwana.
Lakip niini ang unang 300,000 barrels nga gilauman moabot sa dili pa ang Abril 10 gikan sa Malaysia, samtang duha pa ka shipment ang mosunod gikan sa North Asia ug India.
Matod usab ni Energy Secretary Sharon Garin, ang maong buffer stocks nakalatid ubos sa Emergency Energy Security Program, ug adunay igo pang panahon ang nasud aron mudugang og suplay kung gikinahanglan.
Base sa datos sa DOE, ang kasamtangang suplay sa gasolina, diesel ug uban pang produktong petrolyo molungtad pa gikan 47 hangtod kapin 100 ka adlaw, depende sa matang niini.
Bisan paman niini, nagpabiling taas ang presyo sa lana sa Metro Manila ug uban pang urban areas sa nasud. Ang presyo sa gasolina karon anaa na gikan P87.90 hangtod P104.10 kada litro, samtang ang diesel misaka na hangtod P154.20 kada litro.
