DAVAO CITY – Gibutyag ni Leslie Francisco , Information Officer sa Office of Civil Defense (OCD) – 11 nga andam kanunay ang ahensiya sa pagresponde ingon man pagmonitor sa lakat sa panahon ilabi na karon nga nasinatian ang halos sunod-sunod nga pagbundak sa ulan.
Gikanayong 24/7 nga abli ang operation center sa OCD-11, lakip na ang Davao City Disaster Risk Reduction Management Center (CRRMC) diin tumong niini nga maluwas ang mga residente nga anaa sa katalagman.
Una niini, hugtanon ang pahimangno sa OCD 11 ngadto sa katawhan nga kanunay nga mamahimong igmat ug mainampingon karon nga mi-abot na ang kapanahonan sa mga pag-ulan nga sagad mosangpot sa lalum nga mga pagbaha.
Gikanayon sab ni Leslie Francisco, Information Officer sa Office of Civil Defense (OCD) – 11 angay gayud nga motamod ang katawhan sa ginapatuman nga pre-emptive evacuation gumikan kay kung anaa na gayud ang katalagman mas daku na ang kahigayonan sa pagkakalas sa kinabuhi sa mga residente o sa mismong kinabuhi sa nga rescuers.
Gitataw sa OCD-11 nga ang baha sa mga highly urbanized city sama sa Davao daw normal na lamang gawas pa sa mga river system nga ang uban gikan pa sa mga lugar sama sa lalawigan sa Bukidnon.
Ang angayan lamang himoon sa mga taga-Davao mao ang pagseguro sa ilang kaluwasan.
