Patay ang usa ka nurse human gidunggab sa iyang pasyente gahapon, Oktobre 17 ning tuiga, pasado alas 9 sa buntag.
Subay sa rekord, giila ang biktima nga si alyas Marjorie Abuyen Visarra, 51 anyos ug nanarbaho sa Bohol Doctors Hospital.
Subay sa imbestigasyon, anaa sulod sa medical ward ang doctor ug pasyente ug gikatahong paingon na unta nga makagawas ang suspek human na-admit gumikan sa diarrhea.
Apan, usa kaadlaw ayha ang panghitabo, duna matud pay giingon ang biktima ngadto sa suspek nga wa mauyuni niini, rason nga giplanohan niini og unsaon pagpatay ang biktima.
Sa dihang paggawas na ang suspek sa balay tambalanan, kalit lamang matud pa niining gikuha ang gunting sa nurse station ug giduslak ang biktima.
Gumikan niini, naangkon og samad dinunggaban sa liog ang biktima nga maoy nahimong hinungdan sa hinanaling kamatayon niini.
Gawas sa nurse, naangol sab ang usa ka utility personnel nga giilang si Francis Justiniare, 21-anyos human nga giuwang niini ang suspek rason nga nadunggaban kini sa tiyan.
Gilayon sab nga misurender ang suspek ug anaa na sa kwerpo sa kapulisan ug napasakahan na og kasong murder ug physical injury ang suspek nga giilang si Marlito Linguis, 31-anyos nga taga Purok 4, Barangay Magsaysay, Bohol.
