DAVAO CITY – Gikatakda sumala pa nga moduso ug motion for reconsideration ang National Task Force to End Local Communist Armed Conflict (NTF-ELCAC) human nga na-dismiss ang kasong kriminal batok sa “Bakwit School 7” nga gitudlong responsable sa pagdala sa 19 ka mga batang lumad ug gipalayo sa ilang pamilya.
Kahinumduman nga gitudlong responsable niini ang mga magtutudlo sa Salugpungan Ta Tanu Igkanogon kinsa wala nananghid sa mga ginikanan sa mga bata nga ila kining dad-on sa Cebu.
Kahinumduman nga una ng gipasakahan ug pipila ka kaso kaniadtong bulan sa Pebrero sama na lamang sa kidnapping ug serious illegal detention, child exploitation ug human trafficking ang mga magtutudlo sa Davao del Norte Provincial Prosecutors Office human nga naluwas ang mga bata sulod sa University of San Carlos (USC) sa Talamban, Cebu City kaniadtong Pebrero 15.
Apan kaniadtong milabay nga Mayo 14, ang pito ka mga suspek nga responsable sa pagdala sa mga bata ang gipakawad-an ug sala gumikan sa kakulangon ug mga ebidensiya, walay probable cause, ug gawas sumala pa sa jurisdiction sa Davao del Norte ang giduso nga reklamo.
