DAVAO CITY – Nanawagan ang security cluster sa siyudad ngadto sa mga rebeldeng grupo nga dili hilabtan ang mga sakop sa Bantay Bukid volunteers.
Sumala pa kang Public Safety and Security Command Center (PSSCC) deputy head Angel Sumagaysay, mukabat sa 70 ka mga Bantay Bukid volunteers ang gipakatag karon sa bukiron nga bahin sa ikautlong distrito ning siyudad partikular na sa barangay sa Tawantawan ilabi na ang Sitio Ubay-Nanap, Gading, Panigan, ug Sumpitan, Gumalang, Wines, Carmen, ug Tambubong sa Baguio District; ug sa Tamugan, Marilog District.
Gibantayan sumala pa sa mga nahisgutan ang mga kasapaan sa nahisgutan nga dapit batok sa bisan unsa man nga mga illegal nga aktibidad.
Gikanayon ni Sumagaysay, kung adunay grupo sa mga rebelde sa mga bukiron nga bahin sa siyudad, angayan nga dili pasakitan sa mga nahisgutan ang mga Bantay Bukid volunteers.
Gibutang sumala pa sa risgo ang kinabuhi sa mga nahisgutan aron lamang mahimo nila ang ilang trabaho nga proteksiyonan ang kinaiyahan.
Hinuon gi-angkon sa opisyal nga kulang pa gihapon ang siyudad sa paghatag ug panginahanglanon sa mga volunteers.
Aron nga madungagan ang mga personahe sa Bantay Bukid volunteers,plano sumala pa nila nga i-tap ang mga barangay tanods.
