DAVAO CITY – Gikumpirma sa usa ka negosyante sa dakbayan sa Davao kinsa gi-pressure sumala pa sa usa ka kritiko ni Pangulong Rodrigo Duterte nga mutestigo batok sa pangulo ug pamatud-an nga nalambigit kini sa extrajudicial killings (EJK) ug sa iligal nga druga, nga nakigkita siya kang Justice Secretary Vitaliano Aguirre II.
Nakigkita si Guillermina Arcillas kang Aguirre kalabot sa pagpasaka og kaso batok sa kampo ni Sen. Antonio Trillanes IV.
Andam na sumala pa pinaagi sa iyang mga abogado ang tanang dokumento alang alang sa pagpasaka ug kaso sa senador.
Usa lamang matud pa sa mga kaso nga ilang ginahikay sa pagkakaron moa ang Illegal Detention human nga mikabat sa duha ka semana siya nga wala gipa-uli niadtong nakigkita siya sa kampo sa senador aron unta plastaron ang pag witness niini batok kang Pangulong Rodrigo Duterte.
Nasayran nga gibalibaran ni Arcillas ang gihanyag ni Sec. Aguirre nga police protection alang kaniya tungod dako ang iyang pagsalig nga luwas siya dinhi sa dakbayan.
Kahinumdoman nga una nang mipatin-aw si Arcillas sa publiko niadtong Abril diin giakusahan niini si Trillanes nga nanuhol kanila uban ni SPO3 Arthur Lascanas aron iduot ang pangulo sa isyu sa EJK sa nasud.
Sa karon, andam na sumala pa si Arcillas sa unsa mang madangatan sa iyang kinabuhi, apan miapela pa gihapon kini ug pag-ampo sa publiko.
