DAVAO CITY – Kapin P42 million ang nasakmit nga ilegal nga droga sa kapulisan sa Davao Region ning tuig 2022.
Gikanayon ni Police Regional Office 11 spokesperson Police Major Eudisan Gultiano, marijuana ug shabu ang kasagarang makulimbat nga mga ilegal na droga gikan sa mga dinakpan.
Sumala sab sa PRO 11, nakapahigayon na ug 139 ka mga anti-illegal drug operations ang kapulisan karung bulan ug nakakumpiska ug kapin P4.8 million pesos nga kantidad sa ilegal nga droga.
Nagataas ang ihap sa mga nakumpiskang droga tungod sab sa gipasibaw nga operasyon batok sa pagpamaligya ug paghupot sa mga nahisgutang kontrabando.
Gipasalig sa kapulisan nga magpadayon gihapon ang mga operasyon bisan pa man panahon sa Pasko ug Bag-ong Tuig. Samtang nagmuntar na sab ug mga personahe ang kapulisan alang karong panahuna.
Sa pikas bahin, wala pay memorandum nga gipagawas ang PNP mahitungod sa pagbuhi’g balik sa Oplan Tokhang nga unang gilusad panahon sa pagpangatundanan ni kanhi Pangulong Rodrigo Duterte.
via || Bombo LJF
