Gibaha ang mga nagkadaiyang dapit dinhi sa dakbayan kagahapon sa gabii, human sa kalit niining pagbundak sa ulan.
Lakip sa mga gipangbaha mao ang mga kadalanan sa Diversion Road, Maa; Damosa ug Jade Valley Road.
Samtang, gipaigmat sab ang mga residente sa Matina Pangi, gumikan sa kalit niinig pagsaka sa level sa tubig sa maong kasapaan, rason nga gikabalak-an kini sa pipila ka mga residente sa maong dapit.
Gumikan na sab sa kalit nga mga pagbaha, dali sab nga nagmaigmat ang mga residente aron nga makapangandam sa maong pagsaka sa tubig ngadto sa kasapaan, ingun man sa mga kadalanan.
Samtang, nahimong bug-at sab ang dagan sa trapiko kagahapon sa gabii, gumikan sa mga nagkadaiyang pagbaha partikular na sa Damosa area, diin daghan sab ang natanggong nga mga sakyanan ug mga motorista.
Hinuon, walay nahitabong nadamyos sa maong pagbaha, apan nagpabilin gihapong ginapaigmat sa mga hingtungdang ahensya ang mga residente, labi na duol sa mga sapa nga mahimong magbinantayon, aron nga malikay ang kaugalingon sa mga posibleng kapeligrohan nga hatod niining mga kalit-kalit nga mga pag ulan diin maoy hinungdan sa kali-kalit sab nga mga pagbaha.
