DAVAO CITY- Sikop ang usa ka indibidwal nga gitouhang miyembro sa usa ka kriminal group ug wanted usab sa kasong pagpatay atol sa gikasang police operation kagahapong adlawa sa Brgy. Ilangay, Lupon probinsya sa Davao Oriental.
Nadakpan ang nahisgutan pinaagi sa gipahigayong Oplan pagtutugis ug Oplan Salikop sa hiniusang pwersa sa Criminal Investigation and Detection Group (CIDG 11), Davao del Norte Provincial Field Unit, Mawab Municipal Police Station ug uban pa.
Positibong giila ang suspek nga mao si Benjar Rick Egpit alyas “Jay Egpit”, 25 anyos ug residente sa Purok Malinawon, Barangay Ilangay sa Lupon.
Gitunol sa suspek ang usa ka warrant of arrest mahitungod sa kasong murder diin walay girekomendang pyansa ang korte alang sa temporaryong kagawasan niini.
Sa gipahigayong operasyon, nakumpiska sab gikan sa posisyon sa dinakpan ang usa ka unit sa 6mm armscor nga pistola nga dunay usa ka magazine.
Nasayran nga ang nahisgutan usa ka miyembro sa Sevillano Criminal Group nga nalambigit sa gun for hire, gun running ug uban pang mga kriminal nga aktibidad nga naga-operate sa mga probinsya sa Davao Oriental, Davao del Norte ug Davao de Oro.
