DAVAO CITY – Nagtapok-tapok ang tanang mga lumulupyo sa Calinan ning dakbayan alang sa usa ka Interfaith Prayer Rally nga gipangunahan sa mga sakop sa Regional Community Affairs Development Division sa Police Regional Office 11.
Kagahapon bandang alas-3 sa hapon dihang nagkahiusa sa panalangin ang mga religious groups ug organizations alang sa hingpit nga kalinaw sa Calinan taliwala sa nagahitabong kriminalidad sa lugar karong tuiga.
Gikanayon ni PRO 11 Spokesperson PMaj. Catherine dela Rey atol sa ekslusibong pakighinabi sa Bombo Radyo Davao, makatigala gayud ang nahitabong krimalidad sa Calinan nga daw matud pa, dunay negatibong enerhiya nga nipatigbabaw sa lugar.
Gikatala sa Davao City Police Office ang mga dagkong krimen nga nahitabo sa Calinan sugod sa nahitabong kamatayon sa arkitekto nga si Vlanche Marie Bragas kaniadtong Mayo 17, diin napalgan ang patayng lawas niini sa usa ka sagingan.
Dungan sa pag-imbestiga sa krimen ang kalit nga kamatayon sa gitudlong primary suspect nga si Dennis Roy Panzan nga sumala pa pugsanon nga gipa-angkon sa krimen; ang pagkaaresto sa usa ka Renato Bayansao alyas Empoy nga unang nalambigit sa ilegal nga droga; ug ang pagkawala ni Kent Espinosa nga gikatahong gidagit sa mga wa mailhing suspetsado.
Ikaduha ang kamatayon sa duha ka pulis nga sila PCpl. Mark Anthony Elman Corsino ug PSMs.Tito Didal Lague atol sa ilang pagresponde sa usa ka kagubot niadtong Hulyo 26 human sila gitiunan sa napatay nga suspek nga si Benao Maanib Landas ug ang nasikop nga kaubanang si Rico Masacay.
Ulahi ang bag-uhay nga nahitabong pagbusikad sa Purok 31, Roman Diaz Street, Calinan Poblacion, Davao City, niadtong Agosto 8, nga nag-ugat sa usa ka love triangle tali sa tag-iya sa usa ka restobar ug sa mastermind nga si Mcfrel Dacalos Encarnacion nga nagpabiling gawasnon ning kasamtangan samtang nasikop ang iyang kasabwat nga nagbutang sa bomba nga si Roel Coquilla.
Namatay ang usa ug tulo ang nasamdan atol sa nahitabong insidente.
Giklaro hinuon sa opisyal nga walay kalambigitan sa usa’g usa ang mga nahitabong kriminalidad sa lugar apan taliwala sa makangilngig nga panghitabo, nagtambag ang kapulisan nga idungan sa pangamuyo ug panalangin ang kaluwasan sa katawhan sa bisan asang lugar.
via || Bombo LJF
