DAVAO CITY – Nanawagan karon ang Philippine Red Cross – Davao Chapter (PRC-Davao) ngadto sa publiko nga modonar ug dugo ilabi na nga namatikdan sa ahensiya nga ubos lamang ang ihap nga ilang natala dinhi sa rehiyon matag tuig.
Una ng gibutyag ni Davao chapter head, Dr. Eduardo Rodillo, nga anaa lamang sa 8 ngadto na sa 10 porsyento sa populasyon ang modonar ug dugo sa ahensiya.
Gikanayong pinakadakong ihap niini ang naggikan dinhi sa dakbayan. Nasayran nga ang Red Cross – Davao ang maka-release ug 200-300 units ka bag sa dugo matag adlaw aron nga maasikaso ang panginahanglanon sa tibuok rehiyon.
Gawas pa kini sa supply nga regular nila nga ihatag sa mga pasyente sa Southern Philippines Medical Center (SPMC) ug uban pang pribadong hospital.
Gipasabot ni Rodillo nga nanawagan karon ang ahensiya ug tabang ngadto sa publiko aron nga masiguro ang igong supply sa dugo ilabi na nga mohatag sab sila ug hinabang ilabi na sa mga area sa Mati City.
Isip suporta usab sa maong panawagan, ang Bomboradyo Philippines adunay ipahigayon nga simultaneous bloodletting activity karong adlaw nga sabado, Nobyembre 29 sa NCCC mall Buhangin ning siyudad o ang Dugong Bombo 2019.
Mahinungdanon ang susama nga aktibidad gumikan kay kini ang pamaagi aron nga makatabang kita sa atong isig kaingon.
