DAVAO CITY – Nadunggan sa mga Dabawenyo ingon man sa tibuok 20th City Council sa Davao City ang labing unang State of the City Address ni Mayor Sebastian Duterte.
Sa nahitabong panagtapok sa Sangguniang Panglungsod kagahapon, iyang gitagi-tagi og butyag ang mga kalampusan sa pagpangatundanan sa ika-35 nga mayor sa dakbayan.
Pipila lamang sa mga gipasidunggan sa mayor ang digitalization sa pipila ka mga ahensya sa LGU, malampusong pagpahigayon sa mga dagkong kalihukan sama sa MICECON 2023 ug Ironman 70.3 triathlon, pagsaka sa ihap sa mga turista dungan sa pagluag sa COVID19 restrictions, pagsaka sa natad sa ekonomiya ug patigayon, disaster response, infrastructure projects, edukasyon, panginabuhian, lakip na estado sa safety and security sa dakbayan.
Unang bahin pa lamang sa SOCA, adunay gipadunggan ang mayor nga usa ka konsehal nga gikatahapang “nanlibak” apan wala niya kini gibutyag ang maong personahe ug gipamulong nga magkasinabtanay na lamang.
Sa pikas bahin, gipaambit sab sa mayor nga nisaka na ang ihap sa mga registered businesses dinhi sa syudad gikan sa 46,969 niadtong 2019 hangtod 47,338 ka mga negosyo nga dagkong tabang sa dagkong pagtubo sa ekonomiya.
Gipasidunggan sab atol sa State of the City Address ang pagpahinayon sa High Priority Bus System kon HPBS isip kabahin sa transport modernization project sa dakbayan nga gigahinan og P1.5 billion nga pondo gikan sa mga loan sa Asian Development Bank ug ubang ahensya.
Gipasabot sa mayor nga mamahimong pait matud pa ang mahitabong transition sa tanang Dabawenyo apan gilauman nga maghatag kini og dugang kahupayan sa mananakayay sa dakbayan.
Gipasalamatan sab ni Mayor Baste ang kanhi administrasyon sa iyang amahan nga si Former President Rodrigo Duterte sa pagpanukad sa Davao City Coastal Road, ug ang suporta sab ni Pangulong Bongbong Marcos alang sa gisugdan nga Davao City Bypass Road ug sa bag-ong giablihan nga Coastal Road.
Naglaum sab si Mayor Baste ngadto kang PBBM nga masuportahan og matugutan na ang gikasugyot nga waste-to-energy kon WTE facility sa dakbayan.
Matod niya nga mipadayag na sa ilang interes ang gobyerno sa Japan nga motabang sa pagtukod niini nga pasilidad pinaagi sa paghatag sa lokal nga kagamhanan og grant apan midugang nga magkinahanglan sab ang proyekto og dakong counterpart fund gikan sa national government.
Sa pikas bahin, gipasidunggan sab sa mayor ang nahitabong pagdeklara sa insurgency free status sa dakbayan inubanan sa nagpadayog pagpakgang sa ilegal nga droga, loose firearms, ug ubang kriminalidad; lakip na ang pagpakusog sa kampanya sa culture of security.
Nagpasalamat sab ang mayor sa tanang mga ahensya sa LGU nga dungang naglihok alang sa katumanan sa tanang mga programa og serbisyo sa panggamhanan sa Davao City.
Nagpabuhi sab og pamulong ang mayor sa mga tawong manghasi kon maghatag og kagubot sa dakbayan nga sumala pa, makatilaw og latus gikan sa gobyerno.
via || Bombo LJF
