DAVAO CITY – Dungan sa hinay-hinay nga pagbangon sa local hog industry sa Davao City tungod sa epekto nga gihatud kanila sa African Swine Fever (ASF) nga misangpot sa pagkawala sa ilang economic livelihood, nahimong babag na sab karon sa mga hog raisers, meat vendors ug processors ang padayon nga pagpakigbatok sa pagkuyanap sa coronavirus disease (Covid-19).
Bisan nga pabilin na gawasnon ang dakbayan sa Covid-19, gipailalom karon sa community quarantine ang siyudad hinungdan nga misamot nga nawad-an ug panginabuhian ang mga hog raisers ug meat vendors.
Sumala pa sa meat vendor sa Bankerohan nga si Salome Ociones, dako na ang nawala kanila sa bulan sa Pebrero dihang gikumpirma sa Department of Agriculture-Davao Region (DA-Davao) ang kaso sa ASF sa Barangay Dominga ug Lamanan nga susamang nahimutang sa Calinan District.
Apan paglabay sa pipila ka semana nadugang niini ang Barangay Inayangan sa Calinan.
Ang nahisgutan sumala pa nga insidente mihatud ug dakong epekto dili lamang sa mga hog raisers kung dili lakip na sab sa mga meat vendors gumikan kay mibati na sab ug kahadlok nga mopalit ug karne ang mga konsumante.
Apan daw nasamutan kini sa kasamtangan ilabi na nga gipailalom na ang siyudad sa community quarantine hatud sa Covid-19.
Gibutyag ni Hog Farmers Association of Davao Inc. president Eduardo So nga nakita na nila ang epekto sa Covid-19 virus ngadto sa mga meat vendors ingon man sa mga lechoneros sanglit daghanang mga events ug conferences ang gipangkansela karong panahona.
Una ng gibutyag sa DA-Davao, nga kapin sa 5,000 ka mga baboy sa tibuok rehiyon ang gipamatay aron lamang mapugngan ang pagkatag sa ASF.
