DAVAO CITY – Wala sumala pa mipakita ug pagsukol ngadto sa kapulisan ang pipila ka mga indibidwal nga gipailalom sa “Oplan Bolabog” sa Mini Forest, Barangay 23-C aron masubay kung adunay mga gikatahapan nga terorista sa mga nahisgutan.
Una ng gibutyag ni Davao City Police Office (DCPO) spokesperson Senior Insp. Maria Teresita Gaspan nga gidala nila ang 161 ka mga indibidwal sa police headquarter aron nga ipailalom sa “questioning” ug “profiling” ang mga nahisgutan human nga napakyas nga maka-presenta ug valid identifications (IDs) ngadto sa otoridad.
Sa nahisgutan nga operasyon nagkahiusa ang mga personahe gikan sa DCPO, Regional Public Safety Battalion, ug Task Force Davao.
Gikanayong wala gipang-detine ang mga nahisgutan gumikan kay dili sumala pa sila guilty sa terrorism ug rebellion. Kabahin sumala pa kini sa lakang sa otoridad aron nga mapalig-on ang ilang monitoring mechanism sa mga non-residents nga mosulod sa siyudad.
Una ng mihangyo si Gaspan sa mga nanag-iya ug panimalay ug inn operators nga irehistro ang ilang mga bag-ong renters sa ilang barangay.
Gilayon sab nga mihatag ug katin-awan si Senior Supt. Alexander Tagum, DCPO director, nga ang gipahigayon nga operasyon sa kapulisan usa ka preemptive measure aron nga mapugngan ang mga gikatahapan nga terorista nga planong mosulod sa siyudad.
Nakatabang sab sa maong operasyon ang aktibong pagpakiglambigit sa komunidad ngadto sa mga otoridad. Nagpadayon sab sumala pa sila sa pagpangita sa mga tawo nga adunay standing warrants of arrest.
