DAVAO CITY – Gikatala sa Provincial Disaster Risk and Management Office sa Davao de Oro ang nasa kapin dos mil ka pamilya nga naapektuhan atol sa nahitabong pag tay-og sa duha ka linog kaniadtong Martes, Marso 7.
Sumala sa datos nga gipagawas ni PDRRMO Head sa probinsya nga si Jospeh Randy Loy, atol sa ekslusibong pakighinabi sa Bombo Radyo Davao, nasa 2,418 ka mga pamilya ang direktang naapektuhan sa maong linog.
Samtang, 16 ka mga injuries ang natala sa tibook probinsya.
Ang nahitabong magnitude 5.9 nga linog ang direktang miigo sa nasa 746 ka mga pinuy-anan lakip ang 394 ka mga partally damaged ug 352 ka mga totally damaged nga mga panimalay.
Daghanang pamilya ug indibidwal sab ang kasamtangang nagpundo sa tagsa-tagsa ka mga evacuation centers samtang gitubag sab sa provincial government ug ubang ahensya sa gobyerno ang mga pagkaon ug uban pang panginahanglanon sa mga evacuees.
Gikatala sab sa disaster team ang mga pagdahili sa yuta sa may New Leyte, Panoraon, Camanlangan, Tandawan, ug New Bataan.
Maagian na sab sa mga motorista ang Katipunan-Maragusan highway human sa gikatalang landslide nga resulta sa pag-uwan ug linog sa lugar.
Luwas sab sa kasamtangan ang mga pasyenteng gipanghikling gikan sa Davao de Oro Provincial Hospital sa Maragusan nga unang naapektuhan sa nakalabayng linog kaniadtong Pebrero.
Kasamtangan pang ginakonsolida sa disaster management team sa probinsya ang kinatibuk-ang danyos sa imprastraktura, diin sumala pa ni Loy nga posibleng nisamot ang natalang pagkaguba sukad natay-og sa nakalabayng linog.
Samtang nagpadayon gihapon ang relied efforts alang sa mga nabiktimang residente sa probinsya, gikatakdang makigpulong karong simana ang Davao de Oro LGU ug ang team gikan sa PHIVOLCS main office aron magpahigayon og assessment sa mga earthquake affected areas lakip ang pagsusi sa Mt. Leonard nga gikatahong dunay volcanic activity.
via || Bombo LJF
