DAVAO CITY – Nanawagan si Davao City Mayor Sara Duterte-Carpio ngadto sa religious organization nga Iglesia ni Cristo (INC) nga temporaryo una nga ihunong ang religious services ug activities kini luyo sa gipagula nga guidelines sa siyudad kalabot sa pagpahigayon ug mass gatherings.
Sumala sa Mayor, nga nakadawat siya ug report nga tulo ka mga indibidwal sa INC ang nagapadayon sa ilang Sunday services sa milabay nga adlaw.
Una ng nagpagula ang Mayor ug kamandoan nga isuspende ug idili una ang mass gatherings kalakip na ang religious services ug faith-based activities, human ang deklarasyon sa public health emergency sa tibuok nasod.
Gipasabot sa opisyal nga ang pagtapok-tapok sa mga tawo ang posibleng hinungdan usab sa paspas nga pagkatag sa virus.
Sa higayon nga mosupak ang INC kalabot sa maong pahimangno, mamahimong mohimo sab ug legal nga aksiyon ang lokal nga panggamhanan batok kanila.
Kahinumduman nga nagpatuman karon ang mga simbahang katoliko ug pagsuspende sa mga santos nga misa isip pamaagi sab aron nga mapugngan ang pagkuyanap sa corona virus disease (covid-19).
