DAVAO CITY – Subling nagpahimangno ang lokal nga panggamhanan kalabot sa gipatuman nga regionwide lockdown nga nagsugod na kaganinang alas dose sa kaadlawon.
Kahinumduman nga sakop sa maong kamandoan ang dili na pagtugot sa mga tawo nga mosulod sa Davao Region nga gikan sa mga kasikbit nga rehiyon sa Mindanao gawas lamang sa mga sakyanan nga adunay cargo ug usa ka driver ug walay assistants.
Apan ang mga karga niini ang i-unload lamang sa checkpoint ug hulaton ang laing sakyanan nga mokuha niini pasulod sa Davao region dayon mobiya na kini sa rehiyon.
Ang mga sakop sa 10th ID Philippine army ug Police Regional Office (PRO) 11 ang magtunga sa mga areas sa tanan nga mga highways sa Davao Region ug i-assign kini kung asa nga area ang kinahanglan ug proteksiyon sa mga tawo ingon man cargo nga nagsubay sa mga highways.
Mamahimong makagawas ang si bisan kinsa sa rehiyon bisan unsang orasa apan dili na kini mamahimong makabalik sa lockdown period.
Ipatuman ang regionwide lockdown hangtud sa Abril 1 ning kasamtangan nga tuig.
Tipik lamang ang maong lakang human nga pipila na sab ka mga indibidwal sa Mindanao ang nagpositibo sa Covid-19.
Subli sab nga gipahimangnoan ni Mayor Inday ang publiko nga dili mogawas sa panimalay kung dili kini mahinungdanon.
Mogawas lang kung adunay paliton nga tambal, pagkaon og maglabay ug basura. Tumong niini nga mapugngan ang posibleng pagkuyanap sa virus.
