DAVAO CITY- Padayon ang hugot nga inspeksyon ug monitoring sa Land Transportation Franchising and Regulatory Board Davao (LTFRB XI) ngadto sa mga Public Utility Vehicles (PUVs) atol sa ika unom nga adlaw alang sa pagpatuman sa Oplan Bantay Biyahe: Undas 2022 sa Davao City Overland Transport Terminal (DCOTT) o mas nailang Ecoland Terminal.
Tumong sa maong pagpaningkamot nga masiguro nga magpabiling luwas ang matag byahe sa publiko ilabi na panahon sa kalag-kalag diin daghang mga aktibidad ug pagbyahe ang ginapahigayon sa katawhan.
Gipangunahan mismo ni Nonito Llanos III, Regional Director sa LTFRB XI, ang maong inisyatiba aron sab ma-check ang mga manakayay, mga PUV drivers, ug ang transport auxiliary workers.
Dugang pa niini, ubay-ubay na sab ka mga pasahero ang na-assist sa LTFRB XI pinaagi sa ilang gimuntar nga Help Desk nga maoy mutubag sa mga pangutana ug concerns sa mga pasahero.
Sa pikas bahin, gibutyag sa ahensya nga kamatikdan ang moderate to heavy passenger influx karong panahona.
Ang hugot nga terminal inspections ang magpadayon hangtud sa Nobyembre 3.
