DAVAO CITY – Nagkadaiyang reaksiyon ang gibutyag sa mga Dabawenyo sa bag-ohay nga memorandum nga gipagula sa Land Transportation Franchising and Regulatory Board (LTFRB) nga nagtugot sa alagang hayop nga pasakyon sa public utility vehicles (PUVs).
Una ng gi-anunsiyo sa LTFRB nga tugtan na ang mga hayop nga mosakay sa tanan nga PUVs basta kay anaa kini sa kulongan ug ipahimutang sa animal compartment sa PUV aron nga dili sab kini makadisturbo sa uban nga mga pasahero.
Kinahanglan sab sumala pa nga siguruhon sa nanag-iya niini nga walay baho ang hayop ug imentina ang kalimpiyo ug sanitasyon niini.
Responsilidad sab sa sumala pa sa pet owners sa higayon nga makaguba sulod sa sakyanan ang iyang mga alaga ingon man paglimpiyo sa hugaw ug pagmentina sa sanitasyon niini.
Bisan nga gipasalamatan sa netizens ang nahisgutan nga lakang apan pipila niini ang mikuwestiyon partikular na ang klase sa compartment diin ipahimutang ang mga alagang hayop.
Pipila sa mga drivers ang dili uyon gumikan kay mamahimo sumala pa nga mangihi ang mga hayop ug makadisturbo kini sa uban nga mga pasahero.
Gitataw sab ni Marites Batacan, founder sa Animal Rescue, Rehabilitation and Fostering (ARRF), nga ang mga nanag-iya sa hayop kinahangan responsable pinaagi sa pagbutang niini sa kulongan sa higayon nga mosakay kini ug PUVs.
