DAVAO CITY – Milusad ang 1003rd Infantry Brigade og usa ka “loudspeaker operation” aron nga mapataas ang kaamgohan sa publiko sa pakigbatok sa COVID-19 pandemic.
Sumala kang Captain Erick Wynmer Calulot, hepe sa 1003rd Infantry Brigade Civil Military Operations (CMO) nga ang loudspeaker operation usa sa mga stratehiya sa brigada nga tumong mao ang paghatag og eksaktong impormasyon sa mga katawhan sa tukmang oras labi na sa panahon sa mga katalagman.
Matud niya nga ang upat ka mga sub-units sa brigada nga mao ang 3rd, 16th, 89th, ug 56th Infantry Battalions migamit og mga sakyanan nga gibutngan og mga loudspeakers nga mipasibaw og mga importanteng mga anunsyo og gipangbutang ngadto sa lain-laing mga komunidad sa probinsya sa Davao del Norte ingun man sa dakbayan sa Davao.
Gikanayon ni Calulot nga sa maong inisyatibo, mamahimo silang makatabang sa publiko kung papaunsa nila malikayan ang pagkatag sa COVID-19.
Sa pamahayag ni 1003rd IB commander Colonel Nolasco Mempin, gi-awhag niya ang publiko nga sundon ang panawagan sa gobyerno alang sa panaghiusa sa gyera batok coronavirus disease 2019.
Mi-deploy ang 1003rd IB og anaa sa 670 ka mga personahe sa tanang 56 nga gimuntar nga mga COVID-19 checkpoints sa tibuok probinsya sa Davao del Norte ug syudad sa Davao.
