DAVAO CITY – Gibutyag sa Davao City Public Security and Safety Office nga mukabat sa kwatro mil ka mga safety and security personnel ang ipakatag atol sa ipahigayong Parada Dabawenyo ugmang adlawa, Marso 18.
Gikanayon ni DCPSSO head Angel Sumagaysay, nga paigo ang maong ihap sa mga personahe nga mubantay sa nasa dul-ang sinkwenta mil ka mga manan-away nga gilaumang mudagsa atol sa parada.
Iksaktong nasa 4,037 ka mga security personnel gikan sa safety and security cluster sa dakbayan ang i-deploy sa parada ug posibleng mabag-o kini gumikan sa nagkadaghang VIPs nga mubisita sa dakbayan alang sa gikahinamang parada.
Samtang, gikumpirma sa Parada Dabawenyo event organizer nga si Harold Quibete nga anaa sa 277 ka mga contingients ang dungan nga mulatas sa ruta sa parada nga gilangkuban sa 10,000 hangtud 15,000 ka mga tawo.
Magtapok-tapok ang mga partisipante sa Roxas Avenue sugod alas-6:30 hangtug alas-7 sa buntag. Gilauman ang ilang pag-abot sa unang grupo sa mga contingents sa San Pedro Square bandang alas-8 sa buntag.
Nakig-alayon na ang organizing team sa parada sa mga sakop sa PSSO ug City Tourism’s Office alang sa luwas nga Parad Dabawenyo atol sa ika-86 nga Araw ng Dabaw.
via || Bombo LJF
