DAVAO CITY- Posible matud pa nga madungagan ang kaso nga paga-atubangon ni KOJC Founder Pastor Apollo Quiboloy. Kini mao ang gikanayon ni Police General Rommel Francisco Marbil, Chief sa Philippine National Police nga adunay kalabutan sa kasong human trafficking.
Kahinumdumang kagahapong adlawa adunay duha ka mga indibidual ang narescue gikan sa KOJC compound diin usa kini sa 21-anyos nga lalake ug usa ka 50-ayos nga babaye.
Kalabot niini nagpaklaro usab ang Police Regional Office XI nga dili mag-inahan ang naluwas nga matud pa biktima sa human trafficking sulod sa Kingdom of Jesus Christ (KOJC) Compound.
Sumala kay Police Major Catherine Dela Rey,tigpamaba sa PRO Xi nga ang babaeng naluwas mao ang usa ka inahan nga giparesuce sa anak niining taga-Midyasap Cotabato.
Pagsaysay pa sa anak sa biktima nga ikaduhang pagsulay na kini niya nga kuhaon ang iyahang inahan, diin niadtong milabay nga bulan, unom ka oras matud pa kini nagpaabot sa gate sa maong compound aron mahinabi lamang iyahang inahan apan napakyas kini.
Dugang pa niini nga adunay nakasulti kaniya nga nasakit iyahang inahan, maong nabalaka kini.
Samtang ang lalake usab nga 21-anyos ang mihangyo nga iluwas sa iyahang mga ginikanan sa Samar gumikan dili matud pa kini siya paulion.
Sumala pa sa amahan sa maong ulitawo nga nidtong tuig 2021 pa niya kini ulahing nahinabi human nga gisaaran iyahang anak nga hatagan og scholarship sa Cebu City apan nahibal-an na lamang nila nga gidala diay kini sa KOJC Compound dinhi sa dakbayan sa dabaw.
Ang maong pag-rescue ang nahitabo pinaagi sa tabag sa Department of Social Welfare and Development (DSWD) atol sa pagsilbi og warrant of arrest ngadto kay Pastor Apollo Quiboloy ug upat pa niini ka kaubanan nga pulos mga akusado.
Gidala usab ang duha ka biktima ngadto sa RWCPD XI alang sa interview ug documentation.
