DAVAO CITY – Bisan nga kadaghanan sa mga aktibidad ang gipahigayon online atol sa kasaulogan sa Araw ng Davao, nagpatuman pa gihapon ang Davao City Police Office (DCPO) ug hugtanon nga seguridad sa dakbayan ilabi na nga adunay mga tawo nga dili malikayan ang pagsuroy-suroy ilabi na nga mas lu-ag na sugod kagahapon ang restrictions sa dakbayan dungan sa pagpailalom sa alert level 1.
Kahinumduman nga maximum deployment sa ilang mga personahe ang gihimo sa otoridad ilabi na sa mga dapit nga sagad dagsaon sa mga tawo.
Sumala pa kang DCPO spokesperson Maj. Theresita Gaspan nga gipakatag nila ang kapulisan sa pipila ka mga dapit ilabi na kadtong adunay mga aktibidad nga himuon ilabi na sa mga pribadong sektor.
Gani aduna na matud pay template ang DCPO alang sa security plan ug gihan-ay na lamang kini aron nga mahaum sa gikinahanglan nga seguridad sa siyudad.
Pabilin sab sumala pa ang high alert status sa DCPO ilabi na nga nagpadayon karon ang campaign period.
Gipahimangnoan sab niini ang publiko nga hugtanon sba nga gipatuman karon sa kapulisan ang minimum health standards, sama sa pagsuot ug face masks ug social distancing.
Kahinumduman nga ang DCPO adunay kapin 2,000 ka mga personaho latas sa 20 police stations nga gipahimutang sa nagkadaiya nga area sa siyudad.
Sa kinatibuk-an, walay natala nga mga dagkong insidente ang kapulisan sa siyudad atol sa kasaulogan sa Araw ng Dabaw kagahapong adlawa.
