DAVAO CITY- Subling nagpahinumdom ang kampo ni Kingdom of Jesus Christ Pastor Apollo Quiboloy sa pipila ka mga kondisyon alang sa iyahang pagtahan sa kaugalingon.
Sumala kang Atty. Israelito Torreon, ang usa sa mga abogado ni Quiboloy, nga angay nga magbaton ug written declaration si Pangulong Ferdinand Marcos Jr.
Nakalatid sumala pa dinhi nga dili itugyan si Quiboloy sa US kung diin nag-atubang usab kini ug mga kaso.
Dugang pa ni Torreon nga kini lamang ang ilaha sumala pa nga ginahulat isip kasiguruhan ug sa seguridad na usab ni Quiboloy.
Dugang pa sa abogado nga ang nasampit nga lakang ang naglangkob sa kung unsa ang nakalatid sa balaod.
Sukad pa kaniadto, kini na ang kanunay nga hangyo nila kang Pangulong Marcos.
Kahinumduman nga gawas sa Pilipinas, nag-atubang usab ug kaso si Quiboloy sa US nga kini ang gilangkuban sa fraud, ug coercion; sex trafficking of children; marriage fraud; fraud ug misuse of visas; bulk cash smuggling; promotional money laundering; concealment money laundering; ug international promotional money laundering.
Una ng gipasalig ni Pang.Marcos nga mahimong patas ang unsa man nga himuong pagdungog sa kaso ni Quiboloy ug ang paghatag ug kondisyon sa pagtahan niini ngadto sa kagamhanan.
