Gipasalamatan sa mga ‘mistah’ o classmate sa gipatay nga kanhi senior official sa Philippine Charity Sweepstakes Office (PCSO) nga si Wesley Barayuga, ang liderato sa kongreso partikular na sa Quad Committee, gumikan kay homan sa mosobra sa upat katuig, nakab-ot na nila ang hustisya sa katapusan.
Sa nahimong pahayag sa mga miyembro sa Philippine Military Academy (PMA) Matikas Class 1983, nagpasalamat sila kang House Speaker Ferdinand Martin Romualdez ug sa Quad Committee sa gihimong imbestigasyon nga naghatag ug katin-awan sa kamatayon ni Barayuga.
Nagpadayag usab ug paglaum ang Matikas Class nga hingpit na makab-ot sa pamilya ni Barayuga ang hustisya gumikan sa pagbutyag sa mga personalidad nga nalambigit sa kamatayon niini.
Samtang sa kabahin usab ni Speaker Romualdez, gipasalamatan usab niini ang Matikas Class gumikan sa pagsalig nga gihatag sa ilahang Quad Committees.
Kung kahinumduman, milutaw ang kanhi narcotics agent nga si Police Lt. Col. Santie Mendoza ug miangkon nga siya ang gisugo ni kanhi PCSO general manager Royina Garma ug National Police Commissioner Edilberto Leonardo nga patyon si Barayuga, bugti sa P300,000 niadtong panahon sa pandemya sa tuig 2019.
Dugang pa ni Mendoza sa Quad Comm, ang kamando-an ni Garma nga patyon si Barayuga ang gipaagi kang Leonardo.
Si Mendoza nga kanhi Miyembro sa Drug Enforcement Group sa PNP, miangkon nga gitawagan siya ni Leonardo alang sa usa ka special operation batok kang Barayuga nga gipasanginlang high-value target sa drug war ni kanhi Pangulong Duterte.
