DAVAO CITY – Nahimong mapahimuslanon ang gipahigayong Kadiwa ng Pangulo kon KNP dinhi sa Davao Region niadtong miaging semana nga nakahalin na og kapin sa P500,000.
Sumala sa report sa Department of Agriculture 11, ang probinsya sa Davao Oriental ang dunay pinakahataas nga halin nga miabot sa P256,675.
Gisundan kini sa Davao del Sur, Davao del Norte, Davao de Oro ug Davao Occidental.
Nagtumong ang maong inisyatiba sa pagpalig-on sa presyo sa agri-commodity ug paghatag sa mga konsumidor og presko ug barato nga mga palaliton.
Ang KNP kabahin sa paningkamot sa administrasyong Marcos aron matubag ang pagtaas sa presyo sa pagkaon tungod sa global inflation.
Nagtumong ang ahensya sa pagpalig-on sa mga kalihokan sa Kadiwa, pagpalapad sa nasudnong programa, ug pag-establisar og dugang nga merkado alang sa gagmay nga mga mag-uuma ug mananagat aron makabaligya sa ilang mga produkto sa barato nga presyo sa mga kabus nga komunidad.
Gikanayon ni DA-11 KNP focal person Mary Juvy Pregon, gitakdang ipahigayon ang maong kalihukan kaduha sa usa ka bulan, sugod Agosto 15.
Giawhag ang mga local government units sa pagpatuman sa KNP sa ilang tagsa-tagsa ka lugar aron makatabang sa mga mag-uuma ug mga konsumidor.
via || Bombo LJF
