DAVAO CITY – Gikuwestiyon sa 19th City Council ang status ni Indigenous People Mandatory Representative (IPMR) Councilor Bai Halila Sudagar diin wala kini atol sa attendance roll call sa City Council sa gipahigayon nga sesyon.
Gikuwestiyon ni konsehal Joseph Zozobrado ang status ni Sudagar human nga absent kini sulod sa duruha ka mga sesyon.
Una na sab nga gibutyag ni Konsehal Diosdado Mahipus Jr., ang Commission on Election Resolution nga nagkanayong ang IPMR position kinahanglan nga bakantehon sanglit mikandidato si Sudagar sa milabay nga May 2019 midterm elections isip konsehal apan pakyas nga makadaog.
Gibutyag sab ni Mahipus nga kinahanglan dili na ilakip ang IPMR councilor sa roll call sanglit ang hold-over term niini ang na-expire na kaniadtong Pebrero 2018.
Hinuon gikanayon ni Council majority floor leader J. Melchor Quitain nga base sumala pa sa sulat gikan sa National Commission on Indigenous Peoples (NCIP), matapos sa katungdanan si Sudagar kaniadtong Hunyo 18 ning tuig kasamtangan.
Kahinumduman nga na-extend ang termino ni Sudagar human nga wala gitugtan si Cherry Ann Codilla nga makalingkod sa katungdanan gumikan sa kakulangon ug genealogy.
Miduso sab ang nahisgutan ug petisyon nga pakawad-an ug bili ang re-selection process sa milabay nga Mayo 23, diin midaug sa eleksiyon si Datu Demetrio Bolo.
