Mikunhod sa 36% ang mga kaso sa cybercrimes sulod sa unang unom kabulan karong tuiga, matod pa sa Philippine National Police (PNP) Anti-Cybercrime Group o PNP-ACG.
Subay sa datos nga gipadala sa PNP-ACG gikan sa Enero hangtod Hunyo, mitala kini ug 8,177 ka mga kaso sa cybercrimes mas ubos kung ikumpara sa 12,808 ka mga kaso niadtong milabay nga tuig sa susama nga panahon.
Matod pa sa PNP-ACG, mikunhod ang mga insidente sa nagkadaiyang modus sa cybercrime lakip na ang online selling, investment scam ug credit card fraud nga nagpailang epektibo ang cybersecurity measures nga gipatuman sa gobyerno ug sa mga pribadong kompanya.
Dugang pa sa ACG, dakong tabang ang gihimo nilang kampanya sa publiko aron mag-amping sa mga online scam.
Samtang misaka kuno ug gamay ang mga kaso sa cyberlibel lakip na ang photo ug video voyeurism nga indikasyon nga kanunay ang pagamit sa digital platform alang sa mga personal nga panagbangi, lakip na nga pinakadaling ma-share ang mga content sa social media.
