DAVAO DEL SUR- ‘Nalipay ug proud’ mao kana ang gikanayon sa inahan ni Nesthy Petecio, boksingerong musalmot sa 2024 Paris Olympics.
Atol sa pakighinabi sa Bombo Radyo Davao sa inahan ni Petecio nga si Prescilla Alcayde nagpadayag kini sa iyahang kalipay ug ka-proud sa iyahang anak sa dihang nahibal-an niini nga usa kini sa mudala sa flag sa nasud atol sa pag abre sa 2024 Paris Olympics.
Kahinumdumang nakadawat ug pagtimbaya ang mga Olympian boxers nga si Nesthy Petecio ug Carlo Paalam gumikan kay sila ang gitahasan nga mudala sa flag sa nasud sa pag-abre sa 2024 Paris Olympics.
Gidayeg sila sa mga kaubanan nilang atleta ug bisan sa mga fans gikan sa nagkadaiyang bahin sa nasud.
Una niini, gikumperma ni Philippine Olympic Committee (POC) President Bambol Tolentino nga ang duha ka fighter ang magsilbing flag-bearers sa Pilipinas.
Kini na ang ikaduhang pagsalmot sa Olympics sa duha ka boksingero, homan sa ilahang silver-medal debut sa 2021 Tokyo Olympics.
Gawas sa mga nahisgutan, qualified na usab sa Olympics sila si Ernest John “EJ” Obiena, Carlos Yulo, Samantha Catantan, Aleah Finnegan, Emma Malabuyo, Levi Ruivivar, Joanie Delgaco, John Ceniza, Elreen Ando ug Vanessa Sarno.
Ayha pa usab ang opisyal nga pagsugod sa maong olympics, nagpadayag usab ang inahan ni Petecio nga gusto niining ma-uli sa iyahang anak ang bulawang medalya gikan sa 2024 Paris Olympics.
via/ DMA
