DAVAO CITY – Gikompirmar sa Davao City Water District nga adunay dakong surplus sa suplay sa tubig sa siyudad aron matubag ang inadlaw-adlaw nga panginahanglanon sa mga konsumidor taliwala sa pagsaka sa heat index tungod sa El Niño phenomenon.
Sumala pa ni DCWD Spokesperson Jovana Duhaylungsod, nga andam mopatuman ang local water utility sa “conjunctive use” sa ilang surface water ug ground water sources kung adunay dakong pagkunhod sa volume sa supply nga makadeliver ang Davao City Bulk Water Supply Project sa Apo Agua Infrastructura sa dakbayan.
Makahatag ang maong bulk water supply project og 300,000 cubic meters kada adlaw, samtang makakuha ang DCWD ug 340,000 cubic meters kada adlaw gikan sa mga ground water sources, nga labaw pa sa igo aron malukop ang gikinahanglan nga tubig sa siyudad nga nag-aberids ug 300,000 ngadto sa 400,000 cubic meters.
Ang proyekto, nag-tap sa Panigan-Tamugan River alang sa dugang tinubdan sa potable water kon mainom nga tubig sa siyudad.
Matud ni Duhaylungsod nga 70% sa panginahanglan sa dakbayan ang gisuplay sa Bulk Water Supply Project, samtang ang nahabilin nga 30% gikan sa ground water sources.
Nakabenepisyo ang pagpanukad sa mga operasyon sa Bulk Water Supply Project sa DCWD water supply systems sa Calinan, Tugbok, Riverside, Dumoy, Cabantian, ug Panacan.
