Gipamultahan sa Securities and Exchange Commission (SEC) og ₱50,000 ang Home Credit Consumer Finance Philippines, Inc. tungod sa paggamit og dili makatarunganong mga pamaagi sa pagpaningil og utang. Kini human mireklamo ang usaka nangutang nga ang Home Consumer Finance naningil sa usa ka third-party residence nga gipoy-an sa usaka tawo kinsa dili garantor o kaha co-maker sa iyang bayrunon sa loan.
Bisan pa sa sinulat nga pagsupak sa nangutang, gipadayon gihapon sa Home Credit ang ilang mga paningil sa maong pinuy-anan. Sa usaka kamanduan penetsahan og Hunyo 3, nasuta sa SEC Financing and Lending Companies Department nga nakalapas ang Home Credit sa SEC Memorandum Circular (MC) No. 18, Series of 2019, nga nagdili sa dili makatarunganong mga pamaagi sa paningil sa utang, ug sa MC No. 5, Series of 2023, o ang mga lagda ug regulasyon sa Financial Products and Services Consumer Protection Act (FCPA) of 2022.
Lakip sa mga gidili nga pamaagi ubos sa MC 18 ang pagkontak sa mga tawo nga anaa sa contact list sa nangutang gawas sa mga opisyal nga gitakda isip guarantor o co-maker. Matod sa SEC, kini nga binuhatan giisip nga usa ka abusadong pamaagi sa pagpangolekta o pagpaningil sa utang. Gawas sa multa nga ₱50,000 alang sa unang paglapas, gimandoan usab ang Home Credit nga undangon ang pagpaningil sa mga tawo nga dili guarantor o co-maker sa maong loan. Gimanduan usab sa SEC ang kompanya nga susihon ug usbon ang ilang mga polisiya ug pamaagi sa paningil, ug magsumite og compliance report ngadto sa Komisyon.
