Gilambigit ang pangalan ni kanhi Pangulong Rodrigo Duterte sa pagpatay sa tulo ka mga Chinese druglords sa sulod sa Davao Prison and Penal Farm kaniadtong tuig 2016.
Kini ang gibutyag sa duha ka mga testigo sa ikaduhang pagdungog sa Quad Committee sa kamara, mahitungod sa mga isyu sa extrajudicial killings, war on drugs campaign sa administrasyong Duterte ug criminal activities nga gikalambigitan sa Philippine Offshore Gaming Operators.
Mi-atubang kagahapong adlawa sa pagdungog sa Komite sila si Fernando Magdadaro ug Leopoldo Tan aron ibutyag ang mga panghitabo sa sulod sa maximum-security compound partikular sa bartolina, kung diin gipatay nila ang tulo ka mga Chinese nationals nga sila si Chu Kin Tung, Li Lan Yan ug Wong Mien Pin.
Matod pa sa affidavit sa mga nahisgutan, gibutyag ni Magdadaro ug Tan nga gitanyagan sila ug kwarta ug kagawasan bugti sa pagpatay sa tulo ka druglords, gumikan kay aduna na kini pagtugot gikan sa taas.
Gipahayag usab ni Tan nga sa dihang mupadulong na sila sa investigation section, adunay naka-estorya sa cellphone ang usa sa pinakataas kuno nga opisyal sa Davao Prison nga si Superintendent Gerardo Padilla.
Gipahayag pa ni Tan, pamilyar ang tingog nga kaestorya sa opisyal nga susama kang kanhi Pangulong Duterte ug mas misamot ang iyang pagtuo sa duhang gikumperma kuno ni Padilla sa mga kaubanan, nga ang chief executive ang mitawag aron i-congratulate sila sa malampuson nga trabaho.
Gipangatarungan ni Magdadaro ug Tan, walay mipugos o nag-impluwensya sa ilaha apan gikanayon sa mga nahisgutan nga mitumaw sila gumikan sa kahiubos nga wala natuman ang gisaad nga pagawson sila sa bilanggo-an.
Giangkon usab sa duha nga giduol sila sa mga law enforcement officers nga adunay koneksyon sa Duterte administration aron himuon ang pagpatay.
Gawas sa pangalan ni kanhi Pangulong Duterte, migawas usab ang pangalan ni Lt/Col. Garma.
