Patay ang duha ka mga drayber sa motorsiklo human nagbangga kini sa usag usa niadtong Abril 2, 2026, alas-8:00 sa gabii sa center lane sa Blue Star, Brgy. Kinamayan, Santo Tomas. Dugang pa sa gihimong imbestigasyon sa kapulisan, ang Vehicle 1 (V-1) padulong gikan sa Purok 5, Unit 2, Sto. Niño paingon sa Brgy. Kinamayan Proper, samtang ang Vehicle 2 (V-2) gikan sa Cabayangan, Braulio E. Dujali padulong sa ilang puloy-anan sa Santo Tomas.
Nahitabo ang trahedya human ang V-2 misulay og overtake samtang paspas kaayo ang dagan sa V-1 duol sa center lane.Human sa aksidente, dali nga gidala ang mga biktima pinaagi sa Municipal Ambulance ngadto sa Municipal Health Center alang sa dali nga medikal nga atensyon. Bisan pa sa pagtabang sa mga doktor, gipahibalo nga patay ang drayber sa V-1 mga alas-10:20 sa gabii, samtang ang drayber sa V-2 gipahibalo nga patay usab mga alas-10:31, sumala sa sertipikasyon sa Medical Doctor. Ang mga back riders sa duha ka motorsiklo gidala sa Carmen District Hospital alang sa dugang nga pagtambal.
Sumala sa PNP, dali nga mitubag ang ilang personnel, gisirad-an ang lugar aron masiguro ang kaluwasan, gitabangan ang mga biktima, ug gikuha ang custody sa mga motorsiklo alang sa husto nga disposisyon ug imbestigasyon.
Sa kasamtangan, gipasidaan sa PNP ang publiko sa pag-obserbar sa traffic rules, pagmintinar og husto nga tulin, ug pag-amping sa kalsada aron malikayan ang kaparehong trahedya ug mapanalipdan ang kinabuhi. Dugang pa, gidasig sa kapulisan ang tanan motorista ug commuters sa pagtambayayong sa pagmintinar sa road discipline ug public safety, labi na sa lugar nga daghan ang trapiko ug sa kritikal nga panahon sa biyahe
