DAVAO CITY – Padayon karon nga gimonitor sa provincial office sa Department of Trade and Industry (DTI) Davao del Sur ang presyo sa mga nag-unang palaliton human ang pagpanira sa 15 ka mga malls ug department stores tungod sa pag-igo sa 6.3 magnitude nga linog sa milabay nga semana.
Sumala pa kang Marivic Placer, DTI provincial consumer protection division chief, nakadawat sila ug report nga aduna sumala pay pipila ka mga business establishments sa lalawigan ang nagpatuman ug pagsaka sa presyo sa ilang baligya pipila ka adlaw human nga gimando sa lokal nga panggamhanan ang pagpasira sa pipila ka mga dagkong tindahan gumikan sa kadaut niini.
Gilayon sab sumala pa nga girumbo sa price monitoring team ang mga tindahan sa lalawigan nga gitudlong nagpatuman ug pagsaka sa ilang mga paninda.
Ang mga malapason sumala pa nga tindero ang hatagan ug tulo ka adlaw nga motubag gumikan kay mamahimong ikansela ang business license sa higayon nga walag igong basehan ang pagpasaka niini ug presyo sa ilang mga baligya.
Samtang mnanawagan ang DTI ngadto sa mga konsumante nga bisitahon ang ilang online list sa suggested retail prices sa prime commodities pinaagi sa www.dti.gov.ph.
