DAVAO CITY – Lauman nga pakusgan pa sa Department of Trade and Industry 11 ang mga mahinungdanong mga programa nunot sa pagkalagsik pag-usab sa daghanang mga serbisyo karong tuiga.
Sumala ni Juan Basillio Espinosa, ang Regional Planning Officer sa DTI 11, atol sa ekslusbong pakighinabi sa Bombo Radyo Davao, miabot sa 23 ka mga exports investment promotions sa tibuok rehiyon ang gilusad sa tuig 2023, nga nakatabang na sa 243 ka mga exporters sa rehiyon ug nakadani sa 190 ka mga investors.
Adunay 53 ka mga Negosyo Centers sa tibuok rehiyon nga nakaserbisyo sa 40,823 ka mga kliyente nga naglangkob sa 29,377 ka mga Micro, Small and Medium Enterprises kon MSMEs sa Davao Region. Sa 984 ka mga trainings nga gihatag sa ahensya, 23,394 ang natudluan og entrepreneurial, productivity ug skills training and enhancement.
Samtang 921 ka mga negosyante sab ang natabangan sa loan applications sa buhatan.
Sumala pa ni Espinosa, tumong karon sa ahensya nga mapakusgan pa ang ilahang information dissimenation alang sa nagkandaiyang serbisyo sa innovation karong tuiga.
Kini isip tungod sa laraw mahitabo sa mga myembro sa Mindanao Regional Inclusive Center ug mga MSMEs alang sa pagbaton og kasayuran mahitungod sa kolaborasyon kauban ang media outlets ug mga tulunghaan sa Davao Region.
Tumong sab sa buhatan nga maabot sa mga negosyante ang mga mahinundanong proyekto sa gobyerno nga makatabang sa pagpauswag sa ilahang mga negosyo.
