DAVAO CITY – Gilusong ang usa ka drug den nga gikasikop sa tulo ka dinakpan atol sa buy-bust operation nga gilusad sa Block 6, Lot 10, Esmeralda Homes, Purok 1, Barangay Canocotan, Tagum City, Davao del Norte.
Tumong sa maong operasyon ang pagkasikop ni Caunda Disomimba Abdallah, 45 anyos, residente sa susamang dapit. Positibong napalitan si Abdallah ug usa ka gramo kon duha ka pakete sa gituohang shabu nga nagkantidad ug P10,000.
Pagransak sa maong drug den, nasikop sab ang iyang asawang si Rea Mia Abdallah ug mga bisitang si Samuel Briones ug usa ka menor de edad.
Narekober sab mga drug paraphernalia ug kapin kon kulang 9 gramos sa shabu nga nagkantidad ug P135,000.
Gikustodiya na sa Tagum CSWDO ang menor de edad nilang kauban, samtang himas rehas sab ang mga dinakpan nga mag-atubang ug kasong paglapas sa Republic Act 9165 kon Comprehensive Dangerous Drugs Act of 2002.
VIA || Bombo LJF
