DAVAO CITY – PRISO ang usa ka driver ug ang iyahang pahinante human naharang sa checkpoint tungod sa pagkupot og ilegal nga druga sa Barangay Lacson, Calinan District, Davao City, Martes sa kaadlawon, Hulyo 19, 2022.
Ang mga dinakpan nailhan nga mao sila Jay Dumulop, 23 anyos; ug si Gleen Gapate, 40 anyos, pulos taga Cagayan de Oro City.
Subay sa report, sakay sa usa ka delivery van ang duha ka suspek gikan sa siyudad sa Cagayan de Oro pasulod sa siyudad sa Davao.
Pag-agi nila sa checkpoint sa Task Force Davao sa Barangay Lacson, Calinan District, gipailawon sila sa pag-inspection, ug didto nakita ang gituuhang mga ilegal nga druga nga ilahang gidala.
Nasakmit gikan sa mga dinakpan ang 4 ka sachet nga dunay sulod nga gituuhang shabu nga nagkantidad og P7,040 ug uban pang mga drug paraphernalia.
Mga dinakpan gidala dayon ngadto sa buhatan sa Calinan Police Station ug gitanggong sulod sa selda kung diin kasong pagsupak sa Republic Act 9165 kon Comprehensive Dangerous Drugs Act of 2002.
Via || Mel Valledor
