DAVAO CITY- Patay ang usa ka drayber sa prime mover truck human nga nalatayan kini samtang nag-ayo sa daplin sa karsada kagabii.
Giila ang biktima nga si JERSON ALMERO ARISTON, 48-anyos, minyu ug residente sa Prk 13, Tibungco, ning dakbayan sa Davao. Subay sa report gikan sa kapulisan, nahitabo ang disgrasya sa Daang Maharlika National Highway, Km. 12 Sasa, ning dakbayan sa Davao, atubangan sa Kudos Trucking Corporation.
Sa inisyal nga imbistigasyon, alas otso pasado ang takna kagabii, nagbyahe ang prime mover truck gikan sa Kudos Trucking Corporation pinaagi sa Daang Maharlika National Highway, apan pag-abot niini sa kanto sa Km 12 road, Sasa, ning dakbayan sa Davao, ang nasampit nga truck ang temporaryo kining mihunong kini subay sa pamahayag ni MICHAEL MEDECELO BELOTENDES, ang duty security guard sa Kudos niadtong tungura.
Sumala pa sa nahisgutan, nakita niini ang usa ka lalaki nga naghigda duol sa likod nga ligid sa truck sa wala nga bahin nga iyahang gituohan nga adunay gisusi sa maong bahin sa ligid. Apan kalit lamang sumala pa nga midagan ang truck nga maoy hinungdan nga nalatayan ang biktima nga ulahi na niya nahibal-an nga si driver JERSON ALMERO ARISTON ang drayber sa nasampit nga truck.
Gilayon nga girespondehan sa BDRRMC Sasa ang panghitabo apan sa paghiling sa biktima, wala na magpitik ang pulso niini. Dugang sa gihimong imbistigasyon sa kapulisan, usa ka RAUL CHUA, ang kaubang drayber sa biktima, nagsusi sumala pa sa truck ug nasuta niini nga ang brake hose ang natanggal ug gituohan niini nga nag-malfunction. Gikumpisrma sab ni Chua nga ang biktima mao ag nagmaneho sa truck ug wala kini kauban kon helper.
Gilayon nga gidala ang patay nga lawas sa biktima Rivera Funeral Homes.
