DAVAO CITY- Patay ang drayber sa motorsiklo human nga nabangga sa Trailer Truck pasado alas dos sa hapon sa Panacan ning dakbayan sa Davao.
Subay sa report gikan sa kapulisan, naila ang biktima nga si REYNALD AYALA BACALSO, 26 anyos, nga residente sa Bunawan Brook, Bunawan, Agusan del Sur.
Sa imbistigasyon sa traffic section sa Sasa PNP, nahitabo kini sa Daang Maharlika Highway, Km 14, Panacan, ning dakbayan sa Davao nga nalambigit niini ang usa ka Trailer truck ug motorsiklo nga Raider nga gimaneho sa biktima.
Nasayran nga ang trailer truck nagsubay kini sa Daang Maharlika Highway nga gikan sa Sarmiento-Luzville road padulong sa Malagamot.
Apan pag-abot sa atubangan sa AVL Trucking garage, kalit nga niabangga ang motorsiklo sa tuo nga bahin sa truck nga maoy hinungdan nga nabagnos ang biktima sa semento nga dalan ug napadulong kini sa usa ka PUJ nga niadtong tungura nihunong kadali gumikan sa trapiko.
Tungod sa kakusog sa pagkabangga nakahigaom ug bun-og ug pangos sa kalawasan ang biktima.
Girespondehan gilayon sa BDRRMC Panacan ang maong panghitabo ug gidala sa SPMC apan wala na kini masalbar gumikan gideklara kini sa doktor pasado alas tres sa hapon nga nakabsan na sa kinabuhi ang biktima.
Samtang ang drayber sa truck, wala pa mahibal-i sa kapulisan tungod misibat kini human sa maong panghitabo dala ang gimaneho nga sakyanan.
