Gitubuan na og punuan sa saging ang pipila ka bahin sa Maa-Magtuod flyover nga proyekto sa DPWH XI.
Kahinumdumang nahimong unod sa balita ang maong proyekto gumikan sa pagkadelatar ug wala paglihok sa Department of Public Works and Highways XI aron hingpit ng matapos.
Gisugdan ang maong proyekto niadtong tuig 2021 diin hangtod karon wala pa kini natapos.
Nasayrang pipila ka bahin sa maong proyekto og punuan sa saging gumikan sa gidugayon sa maong proyekto diin sa milabay nga mga semana, dunay nagbutang og tarpaulin nga gipaskil sa ginsakpan sa proyekto sa wala pa mailhing tawo ug gibutang sa maong karatula nga ang hinungdan matud pa sa pagkadelatar sa maong proyekto mao ang pagpugong nila Pres. Ferdinand Marcos, Jr. ug House Speaker Martin Romualdez, apan hugot kining gihimakak sa DPWH ug medepensang road right of way ang problema.
Sa karon, gipadayon na sa maong buhatan ang proyekto ug nasayrang gamay lamang ang ihap sa mga trabahante, apan nunot matud pa niini, paningkamutan sa DPWH XI nga ilahang humanon ang proyekto sa unang kwarter sa tuig 2026.
